«Գիտության շաբաթ. Հայաստան»-ը միջազգային փորձի հիման վրա ձևավորված գիտության և տեխնոլոգիաների հանրահռչակման համապետական հարթակ է։ Այն նվիրված է գիտության և տեխնոլոգիաների, ժամանակակից գիտական ձեռքբերումների և դրանց դերի հանրահռչակմանը հասարակության կյանքում։ Գլխավոր նպատակն է՝ գիտությունն ավելի մոտ և հասկանալի դարձնել յուրաքանչյուրի համար, ցույց տալ նրա կիրառական նշանակությունը, ինչպես նաև ոգեշնչել դպրոցականներին ու ուսանողներին դառնալ գիտնականներ և ճարտարագետներ։

«Գիտության շաբաթ. Հայաստան»-ի միջոցառումների շարքը անցկացվում է ամեն տարի։ Կենտրոնական իրադարձությունը Գիտության փառատոնն է, որի այցելուները գիտափորձերի, ցուցադրությունների, խաղերի և հանդիպումների միջոցով անմիջականորեն ծանոթանում են գիտական ու տեխնոլոգիական ձեռքբերումներին։ Դրան զուգահեռ՝ Հանրապետության մանկապարտեզներում և դպրոցներում կազմակերպվում են ապակենտրոնացված միջոցառումներ։ Գիտափորձերն ու նախագծային պարապմունքները վաղ տարիքից երեխաների մոտ ձևավորում են հետաքրքրություն գիտության ու տեխնոլոգիաների նկատմամբ։

Զարգացնել գիտությամբ. սա է այս տարվա «Գիտության շաբաթ. Հայաստանի» թեման։ Նպատակն է՝ ցույց տալ, թե ինչպես են գիտությունը և տեխնոլոգիաներն օգնում զարգացնել պետությունը, որքան անփոխարինելի ու կարևոր են դրանք կրթության, տնտեսության ու մարդկանց կյանքի որակի բարձրացման համար:

«Գիտության շաբաթ․ Հայաստան 2025-ը» անցկացվելու է սեպտեմբերի 30-ից հոկտեմբերի 5-ը` Երևանում և Հանրապետության բոլոր մարզերում։ Երևանի Ազատության հրապարակում կանցկացվի Գիտության փառատոն, դրան զուգահեռ` մայրաքաղաքի ու բոլոր մարզերի մանկապարտեզներում և դպրոցներում կկազմակերպվեն ապակենտրոնացված միջոցառումներ` կապված գիտության ու տեխնոլոգիաների հետ։

«Գիտության շաբաթ․ Հայաստան»-ը բաց է բոլորի համար։ Փառատոնի շրջանակում մասնակից կարող են լինել գիտական ինստիտուտներ, համալսարաններ, գիտության և տեխնոլոգիաների ոլորտում գործող կազմակերպություններ և ընկերություններ, ինչպես նաև ստեղծարար համայնքների ներկայացուցիչներ։ Նրանց մասնակցությունն ապահովվում է՝ կա՛մ հայտի նախնական ներկայացմամբ, կա՛մ մեր հրավերի հիման վրա։

Մանկապարտեզներն ու դպրոցները միանում են ապակենտրոնացված միջոցառումներին՝ գրանցվելով մեր պաշտոնական կայքում։ Իսկ Փառատոնի այցելուները կարող են ազատորեն մասնակցել բոլոր միջոցառումներին՝ առանց գրանցման անհրաժեշտության։

Գիտության փառատոնը վեց օր տևող մեծ բացօթյա միջոցառում է, որը կազմակերպվում է Երևանի սրտում՝ Ազատության հրապարակում։ Այն բաժանված է երեք թեմատիկ բաժինների․ «Զարգացնել գիտությամբ», «Մասնագիտական կողմնորոշում» և «Գիտաֆանտաստիկա»։

Այս օրերին գիտությունն ու տեխնոլոգիաները դուրս են գալիս լաբորատորիաներից ու համալսարաններից և ներկայանում լայն հասարակությանը։ Այցելուներին սպասում են ինտերակտիվ տաղավարներ, իրական ժամանակում անցկացվող գիտափորձեր, վարպետաց դասեր, խաղեր, ցուցադրություններ և հանդիպումներ մասնագետների հետ։

Փառատոնի հարթակում յուրաքանչյուր ոք կարող է տեսնել, թե ինչպես են աշխատում ժամանակակից տեխնոլոգիաները, շփվել գիտնականների ու ճարտարագետների հետ և համոզվել, որ գիտությունը հետաքրքիր է, օգտակար ու հասանելի բոլորին։

Ապակենտրոնացված միջոցառումները անցկացվում են երկրի մանկապարտեզներում և դպրոցներում՝ «Գիտության շաբաթ․ Հայաստան» թիմի կողմից մշակված փաթեթներով։ Դրանք ստեղծված են միջազգային փորձի հիման վրա և ներառում են դասեր, խաղեր, գիտափորձեր ու նախագծային աշխատանքներ։ Փաթեթները կարելի է հեշտությամբ ներբեռնել մեր պաշտոնական կայքից։

«Գիտության շաբաթ․ Հայաստան 2025-ին» անհատները կարող են մասնակցել առանց նախնական գրանցման։